वीरगञ्ज, ४ पुष ।
निर्वाचन र विश्वकप फुटबलको रौनक सकिएसँगै राष्ट्रिय भूमि आयोग पर्सा पुनः तात्तिएको छ । निर्वाचन आचारसंहिताका कारण आफ्ना कामलाई निरन्तरता दिन नपाएको राष्ट्रिय भूमि आयोग पर्साले बाँकी स्थानीय तहका जनप्रतिनिधिसँग छलफल तथा अन्तरक्रिया गरेको छ ।
यसअघि पनि अधिकांश स्थानीय तहमा भइसकेको छलफल, अन्तरक्रिया तथा प्रशिक्षण सोमवार धोबिनी गाउँपालिकामा पनि सम्पन्न भएको छ । आयोग पर्साका अध्यक्ष तबरेज अहमदले धोबिनी गाउँपालिकाका जनप्रतिनिसँग आयोगका गतिविधि र काम कर्तव्यका बारेमा छलफल भएको जानकारी दिए ।
अहमदकै अध्यक्षतामा बसेको बैठकले भूमिहिन दलित, सुकुमबासी र अव्यवस्थित बसोबासीको तथ्यांक संकलन सम्बन्धमा छलफल गरेको छ । बैठकले गाउँपालिकामा आयोगको सेवा केन्द्र स्थापना भएपनि त्यसलाई विस्तार गरेर जिम्मेवार व्यक्ति र कम्प्युटर अपरेटर लगायतका आवश्यक कर्मचारीको व्यवस्थापन गर्ने जिम्मा पालिकालाई दिने निर्णय पनि गरेको छ ।
एक साताभित्र पालिकास्तरीय सहजीकरण समिति गठन गर्नुका साथै वडास्तरीय सहजीकरण समिति पनि गठन गरेर ७ दिनभित्र आयोगलाई जानकारी गराउन आग्रह गरिएको छ ।
पलिकाका प्रत्येक वडामा रहेका अव्यवस्थित बसोबासी, भूमिहिन दलित र सुकुमबासीहरुको तथ्यांक संकलन गर्न सूचना जारी भएपनि प्रतिनिधि सभा र प्रदेश सभा निर्वाचनको समयमा आचारसंहिता लागु भएकाले सेवामा अवरोध भएको हुँदा पुनः सूचना गरी फारम संकलन गर्ने निर्णय बैठकले गरेको छ ।
बैठकमा धोबिनी गाउँपालिकाका अध्यक्ष मदन प्रसाद चौहान, उपाध्यक्ष मञ्जु देवी, भूमि आयोग पर्साका सदस्य सुरेन्द्र प्रसाद सिंह, धोबिनी गाउँपालिका वडा न. २ अध्यक्ष देवेन्द्र प्रसाद कुर्मी, ३ का अध्यक्ष राजकिशोर प्रसाद कुर्मी, ४ का अध्यक्ष अबास मियाँ चुरियार, वडा नम्बर ५ का अध्यक्ष मनोवर अहमद गाउँपालिकाका प्रमुख प्रशासकिय अधिकृत मोहमद नवाज हुसैन लगायतको उपस्थिती रहेको थियो ।
