निर्वाचन आयोगले आगामी प्रतिनिधिसभा र राष्ट्रियसभा चुनावमा भाग लिन इच्छुक राजनीतिक दललाई दर्ताका लागि आह्वान गरेको छ । आयोगले आज जारी गरेको सूचनाअनुसार प्रतिनिधिसभाका लागि मङ्सिर १ गतेदेखि १० गतेसम्म दल दर्ता खुला रहनेछ। त्यस्तै, राष्ट्रियसभाका लागि मङ्सिर १ देखि ७ गतेसम्म दर्ता अवधि निर्धारण गरिएको छ।
आयोगले प्रतिनिधिसभा चुनावमा दुई वा दुईभन्दा बढी दलले एउटै चुनाव चिह्न लिएर प्रतिष्पर्धा गर्न चाहेमा सोसम्बन्धी जानकारी समेत दर्ता निवेदनसँगै नै बुझाउनुपर्ने जनाएको छ।
आगामी फागुन २० गतेदेखि राष्ट्रियसभामा रिक्त हुने एक तिहाइ सदस्यकाे पूर्तिका लागि माघ ११ गते मतदान तोकिएको छ।
त्यसैगरी, प्रतिनिधिसभा सदस्यकाे निर्वाचन फागुन २१ गते हुने आयोगले जनाएको छ।
