धुलिखेल – जिल्ला प्रहरी कार्यालय काभ्रेकाे आयाेजनामा नागरिक सुनुवाई तथा अन्तरक्रिया कार्यक्रम सम्पन्न भएकाे छ । काभ्रेको धुलिखेल नगरपालिकाको सभाहलमा सम्पन्न भएको कार्यक्रममा समुदाय–प्रहरी–साझेदारी कार्यक्रमकाे बिषयमा चर्चा भएकाे थियाे ।
कार्यक्रममा जिल्ला प्रहरी कार्यालय काभ्रेका प्रमुख प्रहरी उपरीक्षक चक्रराज जोशीले स्थानीय तह निर्वाचन २०७९ मा निर्वाचित भएका धुलिखेल नगरपालिकाका जनप्रतिनिधलाई बधाई तथा कार्यकालको शुभकामना दिदैँ जिल्लाको बस्तुस्थितिबारे जानकारी गराएका थिए ।
उनले जिल्लामा अपराध अनुसन्धानको क्षेत्रमा सम्पादन गरिएका कार्यहरुको प्रगति विवरणका साथै प्रहरीले शान्तिसुरक्षा स्थापनाका लागि गरिरहेकाे कामकाे बारेमा जानकारी दिएका थिए ।
समुदायमा शान्तिसुरक्षा प्रहरी एक्लैकाे प्रयासमा मात्रै संभव नहुने भएकाले त्यसका लागि सबैकाे साथ र सहकार्य हुनुपर्नेमा उनले जाेड दिए ।
यस्तै कार्यक्रममा सहभागि जनप्रतिनिधी तथा नागरिकहरुबाट आएका प्रश्नकाे जवाफ दिँदै उनले सडक दुर्घटना न्यूनिकरण, अबैध जुवा तास नियन्त्रण, घरेलु मदिरा बिक्री बितरण र सेवन, आत्महत्या न्यूनिकरण, चोरी लुटपाट, सडक बत्ती, घरेलु हिंसा न्यूनिकरण लगायतका विषयमा प्रहरीले तदारुकताका साथ काम गरिरहेकाे र यस्ता घटनालाई न्यूनिकरण गर्न घरघरबाट सहयाेगकाे खाँचाे रहेकाे उनले औल्याए ।
कार्यक्रममा नगर प्रमुख अशोक कुमार ब्याञ्जु श्रेष्ठले जिल्लाको शान्ति सुरक्षा अमन चयन कायम राख्न प्रहरीले कानुन बमोजिम गर्ने अपराध नियन्त्रण र अनुसन्धान, बिभिन्न सचेतना मुलक कार्यक्रमहरुलाई सफल बनाउन नगरपालिका तयार रहेको बताएका थिए । जिल्लाको समग्र शान्ति,सुरक्षा र अमन चयन कायम राख्ने कार्य प्रहरीको मात्र नभई सबैको साझा कर्तव्य रहेको ब्याञ्जुले बताएका थिए ।
कार्यक्रमका धुलिखेल नगरपालिकाका उपप्रमुख निराजन जंगमले नव निर्वाचित जनप्रतिनिधीहरुले स्थानिय प्रहरी कार्यालयसंग समन्वय र सहकार्य गरी काम कारवाही गरेमा गाउँ नगर र वडाको शान्ति सुरक्षा कायम राख्न सकिने बताएका थिए ।
कार्यक्रममा धुलिखेल नगरपालिकाका नव निर्वाचित १ देखि १२ नम्बर वडाका वडा अध्यक्षहरु, सामुदायिक बिद्यालयका प्रधानध्यापक तथा शिक्षक, पत्रकार, नागरिक समाज, स्थानिय जनसमुदाय लगाएत प्रहरी कर्मचारीहरु समेतकाे उपस्थिती रहेको थियो । कार्यक्रमको सहजीकरण जिल्ला प्रहरी कार्यालय काभ्रेका प्रहरी निरीक्षक राजेश घिमिरेले गरेका थिए ।
