सर्लाही — सर्लाहीको ब्रहम्पुरी गाउँपालिका–४, त्रिभुवननगर नजिकबाट स्रोत नखुलेको ठूलो परिमाणको नेपाली नगदसहित एक भारतीय नागरिक पक्राउ परेका छन्।
गस्तीमा रहेका प्रहरीले भारतबाट नेपालतर्फ प्रवेश गर्दै गरेको भारतीय नम्बर बीआर ३० वाइ ३२८७ मोटरसाइकल जाँच गर्दा रकम फेला पारेका हुन्। मोटरसाइकल चालक भारत बिहार, सितामढी, सोनवर्सा–२ निवासी २९ वर्षीय धर्मेन्द्र महतो रहेको प्रहरीले जनाएको छ।
महतोको साथबाट १२ लाख २९ हजार रुपैयाँ बरामद भएको छ। रकमको स्रोत खुलाउन नसकेपछि महतोसहित मोटरसाइकल र बरामद नगद नियन्त्रणमा लिइएको प्रहरीले बताएको छ।
पक्राउ परेका उनलाई थप अनुसन्धानका लागि सर्लाही जिल्ला प्रहरी कार्यालयमा पठाइएको छ।
