वीरगञ्ज । पर्साको सखुवा प्रसौनी गाउँपालिका – ५ महुवनस्थित गण्डक नहर नजिक सोमबार राति जन्ती जाँदै गरेको कार दुर्घटना हुँदा कारका चालकको मृत्यु भएको छ । दुर्घटनामा कारमा सवार एक जना गम्भीर घाइते भएका छन् ।
बहुदरमाई नगरपालिका–८ रामनगरीका साहेब सहनीको घरबाट सखुवा प्रसौनी गाउँपालिकाको एकडरवा गाउँमा जन्ती जाँदै गरेको बीआर ०६४५ नम्बरको कार अनियन्त्रित भई राति ९:१५ बजेतिर गण्डक नहर छेउको पिपलको रुखमा ठोक्किएर दुर्घटनामा परेको हो ।
दुर्घटनामा चालक र अर्का एक व्यक्ति गम्भीर घाइते भएकोमा बाराको नौतनस्थित एलएस न्युरो अस्पतालमा उपचारका क्रममा चाकलकको राती १०:१५ बजे मृत्यु भएको पर्साका प्रहरी नायब उपरीक्षक हरिबहादुर बस्नेतले जानकारी दिए । मृतक चालकको नाम र ठेगाना खुल्न नसकेको उनले बताए ।
दुर्घटनामा गम्भीर घाइते भएका अर्का व्यक्तिको एलएस न्युरो अस्पतालमै उपचार भइरहेको उनले जानकारी दिए ।
