वीरगञ्ज । पर्सा जिल्लाको जगरनाथपुर गाउँपालिका वडा नम्बर–४ बाट प्रहरीले ठूलो परिमाणमा लागुऔषध गाँजा बरामद गरेको छ।
विशेष सूचनाका आधारमा सशस्त्र प्रहरी बल नेपाल र नेपाल प्रहरी को इलाका प्रहरी कार्यालय पटेर्वासुगौली को संयुक्त टोलीले लु १ त ५७१४ नम्बरको सोनालिका ट्र्याक्टर जाँच गर्ने क्रममा २ क्विन्टल १३ किलो गाँजा लुकाइछिपाइ ओसारपसार गर्दै गरेको अवस्थामा बरामद गरेको हो।
प्रहरीका अनुसार ट्र्याक्टर रोकेर जाँच गर्ने क्रममा चालकसहित गाँजा तस्करहरू प्रहरीलाई देखेपछि फरार भएका थिए।
बरामद गरिएको गाँजा आवश्यक अनुसन्धानका लागि जिल्ला प्रहरी कार्यालय पर्सा मा बुझाइएको छ। ट्र्याक्टर कसको हो तथा गाँजा कसले ओसारपसार गरिरहेको थियो भन्ने विषयमा थप अनुसन्धान भइरहेको इलाका प्रहरी कार्यालय पटेर्वासुगौलीका प्रहरी निरीक्षक समुन्नत अधिकारी ले जानकारी दिएका छन्।
