नेपाली क्रिकेटप्रेमीको बहुप्रतीक्षित नेपाल प्रिमियर लिग (एनपीएल) को तेस्रो संस्करण आजदेखि कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ।
प्रतियोगिताको उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स आमनेसामने हुनेछन्। दुई टोलीबीचको खेल साँझ ५ बजेदेखि सुरु हुनेछ।
मंसिर ५ गतेसम्म चल्ने प्रतियोगितामा लुम्बिनी लायन्स, सुदूरपश्चिम रोयल्स, विराटनगर किङ्स, चितवन राइनोज, जनकपुर बोल्ट्स, पोखरा एभेन्जर्स, कर्णाली याक्स र काठमाडौं गोर्खाजले उपाधिका लागि प्रतिस्पर्धा गर्नेछन्।
यसपटक विजेता टोलीले एक करोड ५० लाख रुपैयाँ पुरस्कार प्राप्त गर्नेछ। त्यस्तै उपविजेताले ८० लाख, तेस्रो हुनेले ४० लाख र चौथो हुने टोलीले ३० लाख रुपैयाँ पाउनेछन्।
आईसीसीको मान्यता प्राप्त यस संस्करणमा डेभिड वार्नर, आन्द्रे रसेल, शाकिब अल हसन, मोइन अली र जिमी निसमजस्ता अन्तर्राष्ट्रिय क्रिकेट स्टारको सहभागिताले प्रतियोगिताको आकर्षण थप बढाएको छ। खेलमा पहिलोपटक डीआरएस प्रविधिसमेत प्रयोग गरिनेछ।
नेपाल क्रिकेट संघ (क्यान) ले लिग चरणका लागि साधारण टिकट पाँच सय र प्रिमियम टिकट एक हजार रुपैयाँ निर्धारण गरेको छ। एलिमिनेटर र फाइनलका लागि भने टिकट दर क्रमशः एक हजार र दुई हजार रुपैयाँ तोकिएको छ।
एनपीएललाई लक्षित गर्दै कीर्तिपुर क्रिकेट मैदानको पूर्वाधार सुधार गर्नुका साथै दर्शकको सुरक्षा र व्यवस्थापनमा विशेष तयारी गरिएको छ।
