धनुषाको जनकपुरधाम उपमहानगरपालिका–२० मा बालिकालाई दुर्व्यवहार तथा ब्ल्याकमेल गरेको आरोपमा प्रहरीले चार जनालाई पक्राउ गरेको छ।
जिल्ला प्रहरी कार्यालय धनुषाका अनुसार असोज ४ गते राति पैदल हिँडिरहेका एक युवक र बालिकालाई दुईवटा मोटरसाइकलमा आएका चार जनाले रोकेर नियन्त्रणमा लिएका थिए। उनीहरूले भिडियो बनाएर सामाजिक सञ्जालमा सार्वजनिक गरिदिने धम्की दिँदै पीडितका अभिभावकबाट मोबाइल बैंकिङमार्फत ६ हजार रुपैयाँसमेत लिएको आरोप छ।
प्रहरीका अनुसार बालिकालाई गलत मनसायले संवेदनशील अंगमा छोएको आरोपसमेत उनीहरूमाथि छ।
पक्राउ पर्नेमा जनकपुरधाम–२० का २३ वर्षीय सुकन महतो, २६ वर्षीय सन्तोष कुमार दास, २२ वर्षीय पनेश कुमार महतो र ३० वर्षीय सुजित महतो छन्। प्रहरीले घटनामा प्रयोग भएका दुईवटा मोटरसाइकलसमेत बरामद गरेको छ।
घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ।
