वीरगन्ज,२९ मंसिर : पर्साको पटेर्वा सुगौली गाँउपालिकाले पालिकाका सामुदायिक विधालयहरुमा निजी श्रोतमा कार्यरत शिक्षकहरुलाई हटाउने निर्णय गरेको छ ।
पालिकामा ३ माध्यमिक र २१ आधारभूत गरि कूल २४ वटा विधालय छन् । ती सबैमा गरि २९ जना शिक्षक शिक्षिका निजी श्रोतमा कार्यरत छन् ।मंसिर २३ गते बसेको गाँउ कार्यपालिकाको बैठकले निजी श्रोतमा कार्यरत सबै २९ जना शिक्षक शिक्षिकाहरुलाइ पुष १ गते देखि हटाउने निर्णय गरेको हो ।
गाँउपालिकाका प्रमुख प्रशासकीय अधिकृत सन्देश यादवले गत सोमबार सार्वजनिक गरेको सूचनामा गाँउ कार्यपालिकाको बैठकले गाँउपालिकाबाट प्रदान गर्दै आएको विधालय सन्चालन अनुदान (निजी श्रोत अनुदान) आगामी पुष १ गतेबाट रोक्का गर्ने निर्णय भएको उल्लेख छ । गाँउपालिकाले विधालयहरुमा नपुग शिक्षकको व्यवस्थापन गर्न आवश्यक प्रकृया अगाडि बढाउने निर्णय पनि गरेको जारी सूचनामा उल्लेख छ ।
गाँउपालिका अध्यक्ष दिनेश चौधरीले यसअघिका जनप्रतिनिधी र कर्मचारीले विधालयहरुमा आवश्यक प्रकृया नै पुरा नगरि हचुवाका भरमा निजी श्रोतमा शिक्षकहरु नियुक्त गरेकाले उनिहरुलाई हटाउने निर्णय गरिएको बताए ।
चौधरीले भने ,‘ निजी श्रोतमा नियुक्त गरिएका शिक्षकहरु कसैको पनि शिक्षण अनुमति पत्र( लाइसेन्स ) नै छैन , लेखा परिक्षणमा अडिटरले मान्दै मानेन् , यसरी उनिहरुको तलब सुविधा मात्रै वर्षेनी ५० लाख भन्दा बढि रकम खर्च भएको देखिन्छ ।
छानबिनका क्रममा निजी श्रोतमा नियुक्त शिक्षकहरुलाई नियुक्त गर्र्दाका बखत पालिका र विधालयले कुनै पनि कागजात नै नमागेको , विना विधाी प्रकृया हचुवाका भरमा नियुक्त गरेको पाइएकाले पुष १ गते देखि ती सबै शिक्षकहरुलाई हटाउने निर्णय गरिएको अध्यक्ष चौधरीले बताए ।
