वीरगञ्ज १६ फागुन । वीरगञ्जको मेनरोडको दायाँबायाँ २५/२५ मिटर क्षेत्रको अतिक्रमण हटाउनुपर्ने सडक विभागले पहल गर्दा सोविरुद्धमा सर्वोच्च अदालतमा विचाराधीन मुद्दामा सोमबार पनि पेसी सरेको छ ।
पछिल्लो तीन वर्षदेखि वीरगञ्जको मेनरोड अतिक्रमण सडक विभागले हटाउने सूचना जारी गरेपछि मेनरोडवासीहरूले सोविरुद्ध सङ्घर्ष समिति बनाएर सर्वोच्च अदालतमा मुद्दा दायर गरेका थिए ।
सडक विभागले विगत तीस वर्षदेखि वीरगञ्जको मेनरोडको अतिक्रमण हटाउने भनेर सूचना जारी गरेको तर अहिलेसम्म हटाउन सकेको छैन ।
पछिल्लो समयमा अन्तिमपटक सूचना भनेर ३५ दिने सूचना जारी गरेको सडक विभागविरुद्ध मेनरोडका बासिन्दाहरूले सर्वोच्च अदालतमा मुद्दा दायर गरेका थिए ।
अहिलेसम्म सो मुद्दाको पेसी हुन सकेको छैन । कैयौंपटक पेसी सूचीमा चढे पनि समय अभाव भन्दै पेसी सर्दै आएको छ ।
सोमबारको पेसी फेरि तीन महीनाको लागि सरेको छ । योसमेत गरी पछिल्लो तीन वर्षमा १७ चोटि पेसी सर्दै आएको छ ।
जेठ ३१ गतेका लागि पेसी सरेको स्रोतले जनाएको छ । अतिक्रमण हटाउन सडक विभागको अभियानमा वीरगञ्ज महानगरपालिकाले पनि पछिल्लो समय हातेमालो गर्ने अभिप्राय देखाएको छ ।
महानगर पनि सर्वोच्चको आदेशको बाटो कुरेर बसेको छ । नगरप्रमुख राजेश सिंहले पनि सर्वोच्चको आदेश भएमा मूल सडकको अतिक्रमण हटाउने बारम्बार उद्घोष गर्दै आएका छन् ।
वीरगञ्जको गण्डकदेखि घण्टाघरसम्म मेनरोडको पूर्वतर्फ २५ मिटर अतिक्रमणमा परेको छ भने पश्चिमतर्फ कम अतिक्रमणमा परेको छ । घण्टाघरदेखि भन्सारसम्म भने पूर्व–पश्चिम दुवैतर्फ २५ मिटर अतिक्रमणमा छ ।
