वीरगञ्ज । पर्सा निर्वाचन क्षेत्र नम्बर ४ का प्रतिनिधिसभा सदस्य रमेश रिजाल सङ्घ सरकारको उद्योग, वाणिज्य तथा आपूर्ति मन्त्रीमा नियुक्त भएका छन् ।
प्रधानमन्त्री पुष्पकमल दाहाल (प्रचण्ड) नेतृत्वको सरकारमा रिजाल नेपाली कांग्रेसको तर्फबाट उद्योग मन्त्रीमा नियुक्त भएका हुन् । नेपाली कांग्रेसको केन्द्रीय सदस्यसमेत रहेका रिजालले आजै मन्त्रीको शपथग्रहण गर्ने कार्यक्रम रहेको छ ।
कांग्रेस मन्त्रिपरिषद्मा ८ वटा मन्त्रालय पाएपनि पहिलो चरणमा जम्मा ४ जनालाई सरकारमा सहभागी हुन् पठाएको छ । पहिलो चरणको मन्त्रीहरुको सूचीमा रिजाल पनि परेका हुन् ।
मंसिर-४ गते सम्पन्न प्रतिनिधि तथा प्रदेशसभा सदस्य निर्वाचनमा रिजाल पर्सा-४ बाट निर्वाचित भएका थिए । उनले आफ्ना निकटतम प्रतिद्वन्द्वी नेकपा एमालेका जालिम मियाँलाई ५ हजार ५३० मतको अन्तरले पराजित गरेका थिए ।
रिजालले ३१ हजार १४२ मत ल्याउँदा एमालेका मियाँले २५ हजार ६१२ मत पाएका थिए ।
को हुन् रिजाल ?
जगरनाथपुर गाउँपालिका-५ धर्मपुर मसिहानी टोलमा जन्मिएका रिजालको बाल्यकाल गाउँमै बित्यो । उनले १४ वर्षको उमेरमै एसएलसी उत्तीर्ण गरेका थिए ।
पछि ठाकुरराम बहुमुखी क्याम्पसबाट बीकम अध्ययन गरेका छन् । उनको बुवा मेघनाथ उपाध्याय नेपाली कांग्रेसमा आवद्ध थिए । उनले ०१५ सालको आम निर्वाचन कांग्रेसबाट लडेका थिए । त्यतिबेला वीरगञ्ज बारा जिल्लामा पर्दथ्यो । त्यसैले उनी विद्यार्थी कालदेखि नै नेवि संघको राजनीतिमा सक्रिय बने ।
बिपी नेपाल फर्केपछि भएको पटना सम्मेलनबाट कांग्रेसको पर्सा जिल्ला सचिवको जिम्मेवारी रिजालले पाए । पछि उनी पर्सा जिल्लाको उपसभापति पनि बने । कांग्रेस सभापति देउवाले प्रजातान्त्रिक कांग्रेस गठन गर्दा नेता रिजालले उनलाई साथ दिए । यसले गर्दा पनि उनी देउवाको प्रीय छन् ।
पार्टीमा अनुशासन समिति संयोजक, कार्य सम्पादन समिति सदस्यमा काम गरिसकेका छन् । वि.स. २०२६, वि.स. २०२८, वि.स. २०३०, वि.स.२०३९, वि.स. २०४२, वि.स. २०४६ र वि.स. २०४६ सालमा गरी झण्डै ३ वर्ष जति उनले जेल जीवन पनि बिताएका छन् ।
जनताबाट अनुमोदन हुने मौका भने उनलाई वि.स. ०४८ सालमा मात्रै मिल्यो । त्यसपछि लगातार उनी पर्सा क्षेत्र नं ४ मा चुनाव लडिरहेका छन् । वि.स. ०४८ सालमा सांसदमा विजयी भए । वि.स. ०५२ सालमा पनि उनलाई जताले प्रतिनीधिसभा सदस्य बनाए । ०५६ सालको निर्वाचनमा सुखद नतिजा आएन ।
वि.स. ०६४ सालमा पूनः सांसद् बने । त्यसपछि वि.स. ०७० र वि.स. ०७४ सालको निर्वाचनमा लगातार पराजित भए । ०७४ सालमा अप्रत्यासित रुपमा उनी पराजित भए । राष्ट्रिय जनता पार्टी नेपालका लक्ष्मणलाल कर्ण निस्किए । कर्णले २० हजार ७ सय ३८ मत ल्याएका थिए । रिजालले १४ हजार ७ सय २ मत मात्रै पाए ।
