वीरगञ्ज । पर्सा जिल्लाको ग्रामीण नाका हुँदै अवैध रूपमा भित्रिएको गहुँ लोड रहेको दुई वटा ट्र्याक्टर प्रहरीले नियन्त्रणमा लिएको छ ।
भारतीय बजारबाट अवैध रूपमा गहुँ नेपाल भित्रिएको विशेष सूचनाको आधारमा जिल्ला प्रहरी कार्यालय पर्साबाट खटेको प्रहरी टोलीले सखुवाप्रसौनी गाउँपालिका – ६ लखनपुरबाट वीरगञ्ज तर्फ आउँदै गरेको मे.१ त ४८४८ र ना.२ त ४५६८ नम्बरको दुई वटा ट्र्याक्टरलाई गहुँसहित नियन्त्रणमा लिएको हो ।
लखनपुर पुल नजिक ट्र्याक्टरलाई रोकेर चेकजाँच गर्ने क्रममा चालक भने ट्र्याक्टर छोडेर फरार भएको पर्सा प्रहरीका प्रमुख प्रहरी उपरीक्षक (एसपी) कोमल शाहले जानकारी दिए ।
नियन्त्रणमा लिइएको गहुँ र ट्र्याकटरको २४ लाख रुपैयाँ मूल्याङ्कन गरेर आवश्यक कारबाहीका लागि वीरगञ्ज भन्सार कार्यालय पर्सालाई बुझाइएको एसपी शाहले बताए ।
