वीरगञ्ज । पर्साको वीरगञ्ज हुँदै बारा पुगेको ट्रकलाई प्रहरीले आफ्नो नियन्त्रणमा लिएको छ । बिलबिजक भन्दा बढी तथा अवैध सामग्री लोड रहेको पाइएपछि ट्रक बारा प्रहरीले नियन्त्रणमा लिएको हो ।
विशेष सूचनाको आधारमा खटिएको प्रहरी टोलीले वीरगञ्जबाट झापा तर्फ जाँदै गरेको ना ३.ख.१४३ नम्बरको ट्रकलाई जितपुरसिमरा उपमहानगरपालिका – १ पथलैयाबाट नियन्त्रण लिएको हो ।
शुक्रवार राति साढे १० बजेको समयमा पथलैया चोकमा ट्रकलाई रोकी चेक जाँच गर्दा बिलबिजक भन्दा बढी र स्रोत खुलाउन नसकेको सामग्रीहरू भेटिएपछि नियन्त्रणमा लिइएको जिल्ला प्रहरी कार्यालय बाराका सूचना अधिकारी एवम् प्रहरी नायब उपरीक्षक (डिएसपी) दधिराम न्यौपानेले जानकारी दिए ।
नियन्त्रणमा लिइएको ट्रकबाट २८ लाख ५० हजार ३ ६३ रुपैयाँ बराबरको खुद्रा सामानहरू बरामद भएको डिएसपी न्यौपानेले बताए । ट्रक र सामग्रीको विषयमा थप अनुसन्धान अगाडि बढाइएको उनले बताए ।
