वीरगञ्ज । शीतलहरसँगै चिसो बढ्दै गएपछि वीरगञ्ज महानगरपालिकाले वडाहरुको चोकचोकमा दाउरा बालेर आगो ताप्ने व्यवस्था मिलाएको छ ।
तत्कालका लागि लगभग २ सय क्विन्टल दाउरा ल्याएर वीरगञ्ज महानगरपालिकाले महानगरका विभिन्न वडाको चोक, अस्पताल र सार्वजनिकस्थलमा मंगलबारदेखि आगो बालेर ताप्ने व्यवस्था मिलाएको हो ।
महानगर प्रमुख राजेशमान सिंहको निर्देशनमा नगर प्रहरी र कर्मचारीहरुको टोलीले वडा अध्यक्षहरुको समन्वयमा घणटघर, माइस्थान, मालपोत, वीर्ता चोक, नारायणी अस्पताल, श्रीराम हल चौक, मुर्लि चौक, रानीघाट मठ, बसपार्क, ६ नंबर गेट अगाडी लगायतका सार्वजनिक स्थलहरूमा दाउरा वितरण गरी आगो ताप्ने व्यवस्था मिलाएको महानगरका सरसफाइ व्यवस्थापन महाशाखाका प्रमुख सर्फुदिन मियाँले जानकारी दिए ।
अब महानगरका ग्रामीण भेगको वडाका सार्वजनिक स्थानमा पनि दाउरा बाँडेर आगो ताप्ने व्यवस्था मिलाइने मियाँले बताए । वीरगञ्जमा शितलहरको शुरूवात भएसँगै महानगरबासीलाई राहत मिलोस् भनेर ३२ वटै वडाका सार्वजनिक स्थलमा दाउरा वितरण गरेर आगो ताप्ने व्यवस्था मिलाइएको मेयर सिंहले बताए ।
महानगरले चिसो बढेसँगै महानगरका सम्पूर्ण विद्यालयमा पुष २३ देखि माघ १ गतेसम्म आठ दिनका लागि पठनपाठन बन्द गरिसकेको छ ।
