वीरगञ्ज । जनमत पार्टीले मधेस प्रदेश सरकारलाई दिएको समर्थन फिर्ता लिएको छ ।
जसपा नेतृत्वको मधेस सरकारले मधेसी जनतामाथि दमन, अत्याचार र विभेद गरेकाले सरकारलाई दिएको जनमत पार्टीका सचिव बिपी साहले जनकारी दिए । मधेस प्रदेश सरकारको दमन र भ्रष्टाचारविरुद्ध जनमत पार्टीले आन्दोलन सुरु गर्ने उनको भनाइ छ ।
मधेस प्रदेशमा जनमतले शिक्षा तथा संस्कृति र श्रम तथा यातायात मन्त्रालय गरी दुई मन्त्रालय लिएको थियो । पार्टीका संसदीय दलका नेता तथा मन्त्री महेशप्रसाद यादवले सरकारलाई दिएको समर्थन पनि फिर्ता लिने निर्णय गरेको भन्दै प्रदेश प्रमुख समक्ष राजीनामा पत्र पेस गरेका छन् ।
यादवले भने,‘नेपालको संविधानको धारा १६८ अनुसार जनमत पार्टीको समर्थन रहेकोमा आजैको मितिबाट सरकारलाई दिएको समर्थन पनि फिर्ता लिन्छौँ ।’
राष्ट्रियसभा चुनावको सिट बाँडफाँटमा भाग नपाएको जनमत पार्टी सत्ता गठबन्धनसँग असन्तुष्ट छ । सोमबार मात्रै सप्तरीमा मधेस कृषि विद्यालयको शिलान्यास कार्यक्रमका क्रममा जनमतले विरोध जनाउने क्रममा मन्त्रीसहित तीन जना सांसद घाइते भएका थिए ।
