वीरगन्ज । धर्मावलम्बीहरुले आज बिहीबार आफनो महान् चाड ईदउल फित्र (ईद) पर्ब हर्षाेल्लासका साथ मनाइरहेका छन् । एक महिना सम्म लगातार रोजा बसेका मुस्लिम धर्मावलम्बीले आज बिहिबार इर्द पर्ब मनाइरहेका हुन् । अरबी पात्रो हिजरी संवत अनुसार , मुस्लिम धर्ममा दशौं महिना (सौवाल) को पहिलो दिन आज बिहीबार विशेष नमाज पाठ गरेपछि तीन दिनसम्म आफूभन्दा ठूलाबडाकहाँ गएर आशीर्वाद लिइन्छ । आशीर्वाद लिन आउने आफन्तलाई सेवई, खजुरलगायत मीठा परिकार खान दिने चलन छ ।ईद पर्बका अवसरमा मुस्लिम धर्मावलम्बीले नयाँ कपडा लगाई साथीभाइकहाँ गएर ईदको शुभकामना आदानप्रदान गर्छन् ।
वीरगन्जमा पनि मुस्लिम धर्मावलम्बीको बाक्लो बस्ती रहेका छपकैया ,लाठगल्ली , मुर्ली , इनर्वा , रानीघाट , श्रीपुर,बहुअरी,इनर्वा लगायतका टोलमा आज बिहीबार बिहानै देखि ईद पर्बको चहल पहल देखिएको छ । यस्तै पर्सा र बाराका ग्रामीण भेगमा पनि आज बिहीबार हर्षोल्लासका साथ ईद पर्ब मनाइदैछ । अरबी पात्रो अनुसार नवौं महिनाको अन्तिम दिन चन्द्रमा देखिएपछि ईदउल फित्र मनाउने कार्यक्रम तय हुने गरेको वीरगन्जका मौलाना नुरुल होदाले जानकारी दिए । नवौं महिनाको अन्तिम दिन बुधबार बेलुका चन्द्रमा देखिएपछि आज ईदउल फित्र मनाइएको हो ।
खुसीपूर्वक दान गरेर दीनदुःखी एवं गरीबलाई बाँडिने भएकाले यो पर्वलाई ईद उल फित्र भनिएको हो । इर्द पर्बको अर्को उल्लेखनीय पक्ष भनेको दीनदुःखी र गरिबलाई दान दिनुपनि हो । यस पर्वमा मुस्लिम धर्मावलम्बीले एक वर्ष भित्रको बचतको साढे दुई प्रतिशत नगद वा जिन्सी दान गर्नुपर्ने विधान मुस्लिम धर्मग्रन्थ कुरानमा उल्लेख गरिएको मौलाना होदाले जानकारी दिए । यसरी दान गरिएको नगद वा जिन्सी दीनदुःखी एवं गरिबलाई बाँडिन्छ । जसलाई जकात भनिन्छ । ईदउल फित्रमा प्रत्येक व्यक्तिले आफ्नो गच्छेअनुसार गहुँ वा त्यस बराबरको नगद दान पनि गर्छन् । जसलाई सत्कार फितर भनिन्छ ।
यो दान आमाको पेटमा आएको बच्चाकोपनि गरिनुपर्छ भन्ने नियम मुस्लिम ग्रन्थमा छ । यो दानपनि दीनदुःखी र गरिबलाई नै दिइन्छ । मुस्लिम समुदायको एक महिना लामो व्रत (रोजा) पूरा भएपछि इदुल फित्र पर्ब मनाइन्छ । एक वर्षभित्र गरेका पाप कटाउन रमजान समेत भनिने यो ब्रत गरिने उनले बताए । एक महिनासम्म दिनभर व्रत गरेर साँझ सूर्यास्तको नमाज पाठ गरिन्छ ।नवाैं महिना रमजानमा बिहान सूर्योदय अघि र बेलुकी सूर्यास्तपछि मात्र मुस्लिम समुदायले भोजन गर्छन् । इर्द पर्बको अवसरमा संघ सरकारले बिहीबार सार्वजनिक बिदापनि दिएको छ ।
