काठमाडौँ । खानेपानी मन्त्री प्रदीप यादवले सगरमाथाको शुद्ध पानी विदेशमा निर्यात गर्न सकिने बताउनुभएको छ ।
खानेपानी तथा ढल व्यवस्थापन विभागद्वारा यहाँ आयोजित आर्थिक वर्ष २०८०/८१ को वार्षिक प्रगति समीक्षा गोष्ठीको समापन कार्यक्रमलाई सम्बोधन गर्नुहुँदै मन्त्री यादवले सगरमाथा र अन्य हिमालबाट आएको सुद्ध पानी विदेश निर्यात गर्न सकिने बताउनुभएको हो ।
उहाँले सोका लागि अध्ययन गर्न मन्त्रालयका कर्मचारीहरुलाई निर्देशन समेत दिनुभएको छ ।
विदेश भ्रमणमा रहेका बेला रसुवाको पानी पिउन पाएको स्मरण गर्नुहुँदै उहाँले भन्नुभयो, “म विदेश गएको बेला रसुवाको पानी खान पाएको थिएँ, कसरी त्यहाँ पुग्यो थाहा भएन तर खुसी लाग्यो । अब हामीले हिमालको शुद्ध पानी कसरी तेस्रो मुलुकमा निर्यात गर्न सक्छौँ, त्यसतर्फ सोच्नु पर्ने बेला आएको छ ।”
