वीरगञ्ज । स्वास्थ्य तथा जनसंख्या मन्त्रालयले आज र भोलि देशैभर पाँच वर्ष मुनिका बालबालिकालाई भिटामिन ‘ए’ क्याप्सुल र जुकाको औषधि खुवाउने कार्यक्रम सञ्चालन गर्दैछ। यो अभियान राष्ट्रिय पोषण कार्यक्रम अन्तर्गत सञ्चालन गरिएको हो।
मन्त्रालयले बालबालिकालाई भिटामिन ‘ए’ का साथै, १५ महिनासम्मका लागि आवश्यक कुनै पनि नियमित खोप छुटेको भए नजिकको स्वास्थ्य संस्थामा जान आग्रह गरेको छ। यसले बालबालिकाको स्वास्थ्य सुदृढ बनाउन महत्वपूर्ण योगदान पुर्याउने अपेक्षा गरिएको छ।
पर्सा जिल्लामा पनि यो कार्यक्रम आज र भोलि सञ्चालन हुँदैछ। पर्सा जिल्ला स्वास्थ्य कार्यालयले ९८ हजारभन्दा बढी बालबालिकालाई भिटामिन ‘ए’ र जुकाको औषधि खुवाउने लक्ष्य राखेको छ। जिल्ला स्वास्थ्य कार्यालयका अनुसार, कुल ९८ हजार ८९८ बालबालिकालाई यो औषधि वितरण गरिने छ।
वीरगञ्ज महानगरपालिकासहित जिल्लाका सबै नगरपालिका र गाउँपालिकामा खोप केन्द्र स्थापना गरिएको छ। पर्सा जिल्लाभर ३८२ वटा खोप केन्द्र सञ्चालन गरिने जानकारी खोप अधिकृत अनिल मिश्रले दिएका छन्।
यस अभियानले बालबालिकाको पोषणको सुधार र जुकाको समस्याबाट मुक्त हुन सहयोग पुर्याउने विश्वास गरिएको छ।
पर्सा जिल्लाका हरेक वडामा खोप केन्द्रहरू स्थापना गरिएकाले अभिभावकहरूलाई आफ्ना बालबालिकालाई समयमा नै भिटामिन ‘ए’ क्याप्सुल र जुकाको औषधि खुवाउन स्वास्थ्यकर्मीहरूले आग्रह गरेका छन्। बालबालिकाको स्वास्थ्यलाई दीर्घकालीन रूपमा सुरक्षित बनाउन यस अभियानलाई सफल बनाउन जनस्तरबाट व्यापक सहयोगको अपेक्षा गरिएको छ।
स्वास्थ्य मन्त्रालयका अनुसार, यो खोप तथा औषधि खुवाइ कार्यक्रमले बालबालिकाको रोग प्रतिरोधात्मक क्षमता बढाउन र पोषणको कमी हुन नदिन मद्दत गर्छ। विशेषगरी, भिटामिन ‘ए’ ले दृष्टि समस्या रोकथाम गर्न र जुकाको औषधिले आन्द्रामा हुने जुकाको संक्रमण हटाउन महत्वपूर्ण भूमिका खेल्ने हुँदा यो अभियानलाई प्राथमिकता दिइएको हो।
स्वास्थ्यकर्मीहरूले जनतालाई समयमै खोप केन्द्रमा पुगी बालबालिकालाई खोप र औषधि खुवाउन सचेत गराउँदै यसले बालबालिकाको भविष्यलाई सुरक्षित राख्न महत्त्वपूर्ण योगदान पुर्याउने बताएका छन्।
