वीरगन्जको ठाकुरराम बहुमुखी क्याम्पसमा मंगलबार हुने भानिएको मतगणना स्थगित भएको छ । स्ववियु निर्वाचन समिति र विद्यार्थी संगठनका प्रतिनिधिबीच भएको छलफलले राति १० बजेदेखि मतगणना गर्ने सहमति भएपनि निर्वाचन समितिले अचानक मध्यरातमा एक सूचना जारी गर्दै मतगणना स्थगनबारे जानकारी दिएको हो ।
ठाकुरराम स्ववियु निर्वाचन समितिका अनुसार सबै सङ्गठन तथा समूहले बाहिरको मतगणनामा बाहिरको प्रतिनिधि पठाएकाले मतगणना स्थगित गरिएको हो । निर्वाचन समिति प्रमुख दिलिप सिंहले मतगणनामा बाहिरको प्रतिनिधि पठाइएकाले मतगणना स्थगित गरिएको पुष्टि गर्नुभयो ।
उहाँका अनुसार मंगलबार स्थगन गरिएको मतगणना बुधबार बिहान १० बजेदेखि सुरु गरिनेछ । स्ववियु निर्वाचनमा मंगलबार बिहान ८ बजेबाट भएको मतदानमा कुल ४३०६ मत खसेको थियो । ४ ठाउँबाट मतगणना गरिने निर्वाचन समितिले जनाएको छ ।ठाकुरराम बहुमुखी क्याम्पसमा भने १० हजार ७ सय २९ मतदाता थिए । स्ववियु सभापतिसहितको पदाधिकारी चयनको लागि बिहान १० बजेदेखि सुरु भएको मतदान साँझ साढे ५ बजे सकिएको हो ।
