सरकारले आज दिउँसो ३ बजे आगामी आर्थिक वर्ष २०८२/८३ का लागि बजेट सार्वजनिक गर्दैछ। उपप्रधान तथा अर्थमन्त्री विष्णु पौडेलले संघीय संसदको संयुक्त बैठकमा बजेट प्रस्तुत गर्ने कार्यक्रम छ।
राष्ट्रिय योजना आयोगअन्तर्गत स्रोत अनुमान समितिले १९ खर्ब ६५ अर्ब रूपैयाँको सीमा तोकेको छ, र बजेट पनि यही हाराहारीमा रहनेछ। चालू वर्षको घटाइएको १६ खर्ब ९२ अर्बको तुलनामा यो बजेट विस्तार हुने देखिन्छ।
नयाँभन्दा पुराना अधुरा योजना पूरा गर्न प्राथमिकता दिइने र तीन करोड रुपैयाँभन्दा कमका आयोजना बजेटमा नराखिने अर्थ मन्त्रालयले स्पष्ट पारेको छ।
वृद्धभत्ता पाउने उमेर बढाउने, सरकारी कर्मचारीको तलब समायोजन गर्ने, र कर संरचनामा हेरफेर गर्ने तयारी पनि बजेटमा समेटिनेछ। विद्युतीय सेवा र गाडीमा कर समायोजन, आयकर र पुँजीगत लाभकरमा समेत परिवर्तनको सम्भावना छ।
बजेट भाषणअघि चालु आर्थिक वर्षको आर्थिक सर्वेक्षण र पछि विनियोजन, अर्थसम्बन्धी र ऋणसम्बन्धी विधेयकहरू संसदमा प्रस्तुत गरिनेछ। विपक्षीको अवरोधबीच पनि बजेट प्रस्तुतिमा सहमति भएको छ।
