रौतहटको कटहरिया नगरपालिका–१, भसेरवामा एक नवविवाहित महिला आल्का यादव घरमै मृत अवस्थामा फेला परेकी छन्। इलाका प्रहरी कार्यालय कटहरियाका अनुसार घटना मंगलबार साँझ करिब ७ बजे घटेको हो।
विजयपुर नगरपालिका–९, बडहरवा निवासी स्व. रामनारायण यादवकी छोरी आल्काको परिवारका अनुसार, उनलाई श्रीमान् र ससुराल पक्षका सदस्यहरूले मिलेर कुटपिट गरी घाटी च्यापेर हत्या गरेका हुन्।
घटनापछि श्रीमान् अन्दाजी २६ वर्षीय अंकेश यादव फरार रहेका छन् भने ससुरा पुकार राय यादवलाई प्रहरीले नियन्त्रणमा लिएको कटहरियाका वरिष्ठ सई विनोद राना मगरले जानकारी दिएका छन्।
पीडित आल्का विवाहपछि श्रीमान्को घरमा बस्दै आएकी थिइन्। शवलाई पोस्टमार्टमका लागि गौर अस्पताल पठाइएको छ।
यस घटनाले स्थानीय क्षेत्रमा शोक र आक्रोश फैलाएको छ। महिलामाथिको हिंसा र घरेलु अत्याचारका दृष्टिले यो घटना गम्भीर र जघन्य अपराधका रूपमा हेरिएको छ। प्रहरीले घटनाको थप अनुसन्धान जारी राखेको जनाएको छ।
