नेपाल प्रिमियर लिग (एनपीएल) क्रिकेटको दोस्रो संस्करणका लागि जनकपुर बोल्ट्सले रिटेन गरिएका खेलाडीहरूको सूची सार्वजनिक गरेको छ। टोलीले सामाजिक सञ्जालमार्फत सात जना खेलाडीलाई रिटेन गरेको जानकारी दिएको हो।
रिटेन गरिएका खेलाडीमा मार्की खेलाडीका रूपमा राष्ट्रिय टोलीका ओपनर आसिफ शेख छन्। साथै अघिल्लो सिजनका कप्तान अनिल शाह, शुभ कंसाकार, किशोर महतो, ललित राजवंशी, तुलबहादुर थापा मगर र रुपेश सिंह पनि रिटेन सूचीमा परेका छन्।
एनपीएलको नियम अनुसार, हरेक टोलीले मार्की खेलाडीबाहेक थप छ जना खेलाडी रिटेन गर्न पाउने प्रावधान छ।
यसअघि काठमाण्डौ गोर्खाज, लुम्बिनी लायन्स, सुदूरपश्चिम रोयल्स, चितवन राइनोज र कर्णाली याक्स ले पनि रिटेन र रिलिज खेलाडीहरूको सूची सार्वजनिक गरिसकेका छन्।
एनपीएलको पहिलो संस्करणमा जनकपुर बोल्ट्सले सुदूरपश्चिम रोयल्सलाई पराजित गर्दै उपाधि जितेको थियो, जसका कारण उनीहरू अहिले साविक विजेता टोलीका रूपमा दोस्रो सिजनमा उत्रिँदै छन्।
