अस्ट्रेलियामा जारी टप इन्ड टी–२० शृङ्खलामा नेपालले आज आफ्नो तेस्रो खेल खेल्दैछ। नेपालले डार्बिनमा नेपाली समयअनुसार बिहान सवा ७ बजे मेलबर्न स्टार्ससँग प्रतिस्पर्धा गर्दैछ।
यसअघि नेपाल दोस्रो खेलमा बङ्गलादेश ‘ए’सँग २९ रनले पराजित भएको थियो भने पहिलो खेलमा आयोजक नर्थन टेरिटोरी स्ट्राइकसँग ४२ रनले हार भोगेको थियो। यो शृङ्खलामा नेपालको यो पहिलो सहभागिता हो।
प्रतियोगितामा ११ टोली सहभागी छन् र प्रत्येक टोलीले लिग चरणमा ६ खेल खेल्ने कार्यक्रम रहेको छ। नेपालले आगामी खेलहरूमा भोली होबर्ट हुरिकेन्ससँग, भदौ ४ गते मेलबर्न रेनेगेड्ससँग र भदौ ६ गते पाकिस्तान साहिन्ससँग प्रतिस्पर्धा गर्नेछ।
आईसीसी टी–२० विश्वकप छनोटको तयारीस्वरूप नेपालले यो प्रतियोगिता खेलिरहेको हो। टप इन्ड टी–२० समाप्त भएपछि नेपालले थप अभ्यास खेल पनि खेल्नेछ।
