बारामा आज बिहान करिब २ बजे मोटरसाइकल अनियन्त्रित भई दुर्घटना हुँदा दुई जनाको मृत्यु भएको छ।
पथलैयाबाट निजगढतर्फ जाँदै गरेको ना ३३ प ६८५७ नम्बरको मोटरसाइकल जीतपुरसिमरा उपमहानगरपालिका–१ स्थित डुङ्ग्रे पुलको रेलिङमा ठोक्किँदा घटनास्थलमै गम्भीर घाइते भएका दुबै जनाको मृत्यु भएको हो।
इलाका प्रहरी कार्यालय सिमराका अनुसार घाइतेहरूलाई उपचारका लागि परवानीपुरस्थित एल.एस. न्युरो अस्पताल लगिएकोमा चिकित्सकले दुबैलाई मृत घोषणा गरेका हुन्।
मृतकमा मोटरसाइकल चालक साजन तमाङ (२० वर्ष), जीतपुरसिमरा–१५ नयाँ बस्ती निवासी र किरण मोक्तान (२२ वर्ष), सोही उपमहानगरपालिका–१४ खयरघारी टोल निवासी रहेका छन्।
प्रहरी नायब उपरीक्षक वेद प्रकाश जोशीका अनुसार दुबै जनाको शव परीक्षण गरी परिवारलाई जिम्मा लगाइएको छ।
दुर्घटनाको कारणबारे थप अनुसन्धान भइरहेको प्रहरीले जनाएको छ।
