वीरगञ्ज । जनकपुरधाम उपमहानगरपालिका – १६ पुल चोकको रेल्वे लिक नजिकै रहेको पोखरीको डिलमा एक युवति र बालिका जलिरहेको अवस्थामा मृत फेला परेका छन् ।
युवति र बालिका जलिरहेको अवस्थामा देखेपछि स्थानीयले बुधवार राति करिब ९ बजे प्रहरीलाई खबर गरेका थिए । प्रहरी पुग्दासम्म युवति र बालिकाको मृत्यु भइसकेको थियो ।
राति नै दुवैको शव पोस्टमार्टमका लागि प्रादेशिक अस्पताल जनकपुरधाम लगियो ।
मृतक युवती महोत्तरीको मनरासिसा नगरपालिका २ कि २३ वर्षीय प्रियङ्का महतो रहेको धनुषाका प्रहरी प्रवक्ता एवम् प्रहरी नायव उपरीक्षक (डिएसपी) रञ्जन अवाले जानकारी दिए ।
उनका अनुसार जलेर मृत्यु भएकी बालिका करिब ८/९ महिनाकी छन् । उनी मृतक युवतीकै छोरी रहेको अनुमान छ । तर पुष्टि भएको छैन । घटनाबारे थप अनुसन्धान भइरहेको छ ।
डिएसपी अवाले भने, ‘मृतक युवतिको आफन्तलाई जानकारी गराएका छौँ । उहाँहरू अहिले आइसकेका छैन । आएपछि घटनाबारे थप कुरा खुल्छ ।’
