थाइल्यान्डले कम्बोडियासँग युद्ध हुन सक्ने चेतावनी दिएको छ । थाइल्यान्डका कार्यवाहक प्रधानमन्त्री फुमथाम वेचाचाईले थाइल्यान्ड र कम्बोडियाबीच चलिरहेको भयङ्कर द्वन्द्वले ‘युद्ध निम्त्याउन सक्ने’ बताउनुभएको बीबीसीले जनाएको छ ।
यस द्वन्द्वमा अहिलेसम्म कम्तीमा १६ जनाको ज्यान गइसकेको छ र लाखौं मानिसहरू घरबारविहीन भएका छन् । विवादित सीमा क्षेत्रमा दुई देशबीच दोस्रो दिन पनि द्वन्द्व चलिरहँदा थाइल्यान्डका कार्यवाहक प्रधानमन्त्री वुचाचाईले युद्ध शुरू हुन सक्ने चेतावनी दिनुभएको हो ।
अहिले भइरहेको तनाव एक शताब्दीभन्दा पुरानो सीमा विवादको अंश हो र अब यो द्वन्द्व द्रुत गतिमा गम्भीर बन्दै गइरहेको छ । थाइल्यान्डको उबोन रत्चाथानी र सुरिन प्रान्तहरूमा भएको झडपमा दर्जनौं घाइते भएका तथा एक लाख जनाभन्दा धेरै नागरिकहरू विस्थापित भएका खबरमा उल्लेख छ ।
यसैबीच कम्बोडियाको ओड्डार मिन्चे प्रान्तमा झन्डै एक हजार पाँच सय परिवारलाई सुरक्षित ठाउँहरूमा सारिएको छ ।
