पर्साको पटेर्वा सुगौली गाउँपालिका–५ मा अब विवाह गर्नुअघि वडा कार्यालयबाट स्वीकृति लिनु अनिवार्य हुने भएको छ । मंगलबार वडाध्यक्ष विपिन मुखियाको अध्यक्षतामा बसेको वडा कार्यपालिकाको बैठकले बालविवाह नियन्त्रण र सामाजिक अनुशासन कायम गर्न यस्तो निर्णय गरेको हो ।
वडाध्यक्ष मुखियाका अनुसार अब वडा नम्बर ५ मा कोही पनि व्यक्ति विवाह गर्नुअघि अनिवार्य रूपमा वडा कार्यालयमा स्वीकृति लिनुपर्नेछ । वडाको स्वीकृति बिना विवाह गरेमा सम्बन्धित व्यक्तिमाथि कानुनबमोजिम कारबाही हुने निर्णय गरिएको छ ।
त्यसैगरी विवाह गर्ने केटा–केटी दुवैको उमेर २० वर्ष पूरा भएको हुनुपर्ने, अन्यथा विवाह अमान्य ठहर्ने निर्णय पनि बैठकले गरेको छ ।
बालविवाह रोकथाम र सचेतना अभिवृद्धिका लागि घरदैलो जनचेतना कार्यक्रमसमेत सञ्चालन गरिनेछ ।
बैठकमा वडाध्यक्ष विपिन मुखियासँगै वडा सदस्यहरू मदन मिश्र, पारस साह कानु, रजमतिया देवी दुसाद र नूरबानो मियाइनको पनि सहमति र हस्ताक्षर रहेको वडाले जनाएको छ ।
स्थानीय तहबाट बालविवाहजस्तो सामाजिक विकृति अन्त्य गर्न गरिएको यो पहललाई उदाहरणीय रूपमा हेरिएको छ ।
