मधेस प्रदेशका मुख्यमन्त्री सतिशकुमार सिंहले स्विट्जरल्याण्डमा आयोजना हुने कार्यक्रममा सहभागी हुनुपर्ने भएकाले कार्यवाहक मुख्यमन्त्रीको जिम्मेवारी भौतिक पूर्वाधार विकास मन्त्री सरोजकुमार यादवलाई सुम्पिएको घोषणा गरेका छन्।
मुख्यमन्त्री सिंह आगामी अगस्ट ३१ देखि सेप्टेम्बर ६ सम्म सो कार्यक्रममा सहभागी हुन स्विट्जरल्याण्ड प्रस्थान गरेका छन्। उनले बिहीबारको मितिमा लेखेको पत्रमार्फत यादवलाई कार्यवाहक मुख्यमन्त्री तोकेको जानकारी दिएका हुन्।
पत्र अनुसार, “म फर्किन नआउन्जेलसम्मका लागि तपाईंलाई मधेस प्रदेश सरकार (कार्यसम्पादन) नियमावली, २०८० को नियम १४ को उपनियम (३) बमोजिम कार्यवाहक मुख्यमन्त्री तोकेको व्यहोरा जानकारी गराउँछु,” मुख्यमन्त्री सिंहले उल्लेख गरेका छन्।
यस निर्णयसँगै सरोजकुमार यादवले मुख्यमन्त्रीको सबै प्रशासनिक जिम्मेवारीहरू कार्यवाहकको रूपमा सम्हाल्ने छन्।
