स्वास्थ्य तथा जनसंख्यामन्त्री डा. सुधा गौतमले सरकारले फागुन २१ मा हुने निर्वाचन समयमा सम्पन्न गराउन प्रतिवद्ध रहेको बताउनुभएको छ।
सोमबार भक्तपुर क्यान्सर अस्पतालको ३१ औं वार्षिकोत्सव कार्यक्रममा बोल्दै मन्त्री गौतमले निर्वाचन सफलतापूर्वक सम्पन्न गराउन आवश्यक वातावरण सिर्जना गर्न सबै राजनीतिक दललाई आग्रह गर्नुभयो।
उहाँले वर्तमान सरकारले जेनजी आन्दोलनले दिएको म्यान्डेटअनुसार सुशासन र भ्रष्टाचार नियन्त्रणका लागि आवश्यक कदम चालिरहेको उल्लेख गर्दै आधारभूत अस्पताल र स्वास्थ्य चौकीमा निःशुल्क औषधि वितरण कार्यक्रमलाई प्रभावकारी रूपमा अघि बढाउन स्थानीय सरकारलाई सचेत गराउनुभयो।
मन्त्री गौतमले संघीय सरकारले स्थानीय सरकारलाई जनतामा गुनासो नआउने गरी आधारभूत स्वास्थ्य सेवा उपलब्ध गराउन ससर्त अनुदानको व्यवस्था गरेको पनि जानकारी दिनुभयो।
