पर्सा – नेकपा एमाले पर्सा जिल्ला कमिटीको आयोजनामा आज वीरगञ्जमा उत्साहपूर्ण र्याली र जनप्रदर्शन सम्पन्न भएको छ। शनिवार आयोजित कार्यक्रममा पार्टीले जिल्लाको सदरमुकाममा शक्ति प्रदर्शन गर्दै वर्तमान सरकारको गतिविधि र विदेशी प्रभावविरुद्ध कडा आपत्ति जनाएको थियो।
र्यालीमा सहभागीहरूको भीडले केही समय मुख्य सडक अवरुद्ध बनाएको थियो। कार्यक्रममा सम्बोधन गर्दै नेकपा एमालेका केन्द्रिय सदस्य प्रभु हजराले वर्तमान सरकारले संविधान र जनादेशविपरीत शासन गरिरहेको आरोप लगाउँदै संसद पुनरस्थापना आवश्यक रहेको बताएका थिए।
उनले जेनजी आन्दोलनको माग जायज भए पनि संसद पुनरस्थापना नभएसम्म पूरा नहुने बताए।
हजराले पार्टी कार्यकर्तालाई आन्तरिक एकता र राजनीतिक जागरूकता बढाउन आग्रह गर्दै विदेशी हस्तक्षेप स्वीकार्य नभएको स्पष्ट पारे। र्यालीका सहभागीहरूले ‘विदेशी सरकार मुर्दावाद’, ‘अवैधानिक सरकार हटाऔ, संसद पुनरस्थापना गर’, ‘एनजियो सरकार मुर्दावाद’, ‘विदेशी दलाली बन्द गर’ र ‘एमाले जिन्दावाद’ जस्ता नारासहित मार्च गरेका थिए।
कार्यक्रम नेकपा एमाले पर्सा जिल्ला अध्यक्ष विश्वम्भर शर्माको अध्यक्षतामा सम्पन्न भएको थियो। यसमा पार्टीका केन्द्रिय सदस्य, जिल्ला पदाधिकारी, स्थानीय नेता, युवाहरू, महिला समूह र विभिन्न संगठनका प्रतिनिधिहरूको सक्रिय सहभागिता रहेको थियो।
सत्ताविरुद्धको यस र्याली–जनप्रदर्शन नेकपा एमालेको केन्द्रिय कमिटिले देशव्यापी जनजागरण अभियानको भागका रूपमा आयोजना गरेको बताइएको छ।
