बहुदरमाई नगरपालिकाको नगर स्तरीय योजना अन्तर्गत बहुदरमाई नगरपालिका–२ सिसियाडी टोलमा वार्ड कार्यालयदेखि मेन रोडसम्म ढलान कार्य शुभारम्भ गरिएको छ।
कार्यक्रममा सिंहासन साह को प्रमुख आतिथ्य रहेको थियो। साथै वडा अध्यक्ष जितेन्द्र पटेल, गोवालचन प्रसाद यादव, भुवाली यादव, फुलेना साह तेली तथा प्रभु साह लगायत स्थानीय जनप्रतिनिधि तथा समाजसेवीहरुको उपस्थिति रहेको थियो।
नगरपालिकाका अनुसार उक्त ढलान कार्यका लागि १० लाख रुपैयाँ बजेट विनियोजन गरिएको छ। यस योजनाले स्थानीय बासिन्दालाई आवतजावतमा सहजता प्रदान गर्नुका साथै वर्षायाममा हुने हिलो तथा जलजमावको समस्या समाधान गर्न मद्दत पुग्ने विश्वास लिइएको छ।
कार्यक्रममा बोल्दै नगरप्रमुख सिंहासन साहले विकास निर्माण कार्यलाई प्राथमिकतामा राख्दै जनताको आवश्यकताअनुसार योजना सञ्चालन गरिने बताउनुभयो। स्थानीय बासिन्दाले पनि योजना कार्यान्वयनप्रति खुशी व्यक्त गर्दै समयमै गुणस्तरीय काम सम्पन्न गर्न आग्रह गरेका छन्।
