स्थानीय तहको निर्वाचन अघि लोकतान्त्रिक समाजवादी पार्टी (लोसपा) बाट वीरगञ्ज महानगरपालिकाको मेयरमा दावी गरेका सुरेन्द्र कुर्मी तामझाम बिना पार्टी परित्याग गरेका छन् ।
लामो समयसम्म मधेश वादी दलमै रहेका अधिवक्तासमेत रहेका कुर्मीले लोसपा परित्याग गरेर जनता समाजवादी पार्टी (जसपा) मा प्रवेश गरेका हुन् । फुलमाला तथा अबिर लगाएर उनलाई कसैले पार्टीमा स्वागत भने गरेको छैन । लोसपाभित्रको आन्तरिक विवाद र कलहका कारण जसपाले आयोजना गरेको एउटा कार्यक्रममा सहभागी भएर उनले जसपामा प्रवेश गरेको जानकारी गराएका हुन् । उनी कार्यक्रममा सहभागी मात्रै भएनन्, भाषणसमेत गरेर जसपाको गुनगान गाउँदै जसपामा प्रवेश गरेको उद्घोष गरेका हुन् ।
तामझाम बिना नै जसपामा प्रवेश गरेका कुर्मीलाई पार्टीमा आउने बित्तिकै पर्साको क्षेत्र नम्बर २ बाट प्रतिनिधि सभा सदस्यका लागि प्रत्यक्षतर्फ सिफारिस गरेको छ । यात्रा डेलीलाई प्राप्त स्रोतका अनुसार उनले लोसपाकै प्रदेश सभा सदस्य रमेश कुर्मीको क्षेत्रबाट प्रदेश सभा सदस्यमा उम्मेदवारी दिने माग गरेका थिए । यद्यपी सो क्षेत्रबाट प्रदेश सभा सदस्य कुर्मी निर्विकल्प उम्मेदवार भएपछि उनी पार्टीसँग रुष्ट बनेर जसपामा गएको हुन सक्ने अनुमान लगाइएको छ ।
पर्साको क्षेत्र नम्बर २ (ख) बाटै लोसपाका रमेश पटेलको विरुद्धमा उनी नै उम्मेदवार बन्न सक्ने प्रबल सम्भावना पनि देखिएको छ । प्रतिनिधि सभा सदस्यमा नभएपछि २ (ख) बाट जसपाका उम्मेदवार कुर्मी बन्ने निश्चित देखिन्छ ।
सोही क्षेत्रबाट सिफारिस भएका कामेश पंडित, प्रेमबाबु प्रसाद, मुकेश द्विवेदी, रुपेशमान सिंह श्रेष्ठ, संजिव कुमार यादव र मन्टु गिरीको अगाडी राजनीतिक हिसावले पनि कुर्मीकै पकड बलियो भएको हुँदा सुरेन्द्र कुर्मीलाई नै टिकट दिने आन्तरीक तयारी रहेको पार्टीभित्रको स्रोतले जनाएको छ ।
