हेटौंडा १ मंसिर । सरकारी स्वामित्वमा रहेको हेटौंडा सिमेन्ट उद्योग पूर्ण क्षमतामा सञ्चालनमा आएको छ । लामो समय बन्द रहेर सञ्चालनमा आएको केही समयमै पूर्ण क्षमतामा उद्योगले दैनिक ७५० मेट्रिक टन सिमेन्ट उत्पादन गरिरहेको उद्योग प्रशासनले जानकारी दिएको छ ।
यसअघि उद्योगले ३०० देखि ४०० मेट्रिक टन सिमेन्ट उत्पादन गर्दै आएको थियो । उद्योगका महाप्रबन्धक वसन्तकुमार पाण्डेले उद्योगले १० वर्षपछि पहिलो पटक पूर्ण क्षमतामा सिमेन्ट उत्पादन शुरू गरेको जानकारी दिए ।
मङ्सिर ४ गते हुने प्रतिनिधिसभा र प्रदेशसभाको निर्वाचनपछि सिमेन्ट विक्री वितरण शुरू गरिने उनको भनाइ छ । हाल सिमेन्ट प्याकिङ गर्ने कार्यसमेत शुरू भइसकेको छ । कोइलाको अभावको कारण विगत तीन महीनादेखि बन्द रहेको उद्योग दुई हप्ता अघि सञ्चालनमा आएको हो ।
कोइला बिक्रेतासँग अनुरोध गरेर केही समयका लागि कोइलाको व्यवस्थापन गरी उद्योग सञ्चालनमा ल्याइएको उद्योग प्रशासनको भनाइ छ । भारत, भूटान र इण्डोनोसियालगायतका देशबाट कोइला आउन थालेपछि उत्पादन शुरू भएको हो ।
उद्योगले गरेको प्रारम्भिक अध्ययनबाट प्लान्ट मर्मतका लागि ८० करोडदेखि १ अर्ब र नयाँ प्लान्ट निमार्णका लागि ५ अर्बदेखि ८ अर्ब रुपैयाँ खर्च हुने देखिएको छ । उद्योगमा हाल २१८ जना कर्मचारी छन् । -रासस
