वीरगञ्ज, ३ पुष । सप्तरीको कञ्चनपुर नगरपालिकामा पाँच जना अति विपन्न मधेशी दलितहरूको मृत्यु भएपछि मधेशी आयोगले ध्यानाकर्षण भएको जनाएको छ ।
उपचारकै अभावमा उनीहरूको मृत्यु भएको घटनाबारे अनुगमनका लागि आयोगले एक अनुगमन टोली पठाउने निर्णय गरेको छ ।
आयोगकी उपसचिव सबिता डङ्गोलले आइतबार एक प्रेस विज्ञप्ति जारी गर्दै राज्यले हरेक नागरिकको उपचारको ग्यारेन्टी गरेपनि वर्षेनी हुने यस्ता घटनाप्रति आयोगको गम्भीर ध्यानाकर्षण भएको उल्लेख गरेकी छन् । आयोगका अध्यक्ष डा. विजयकुमार दत्तले आयोगले यस्ता संवेदनशील घटनाहरूको अल्पकालीन र दीर्घकालीन समाधानको लागि विभिन्न समयमा सिफारिस र ध्यानाकर्षण गराएपनि सरकारको बेवास्ताले गर्दा घटनाहरू दोहोरिने गरेको बताए ।
आयोगले पीडित परिवारलाई सहयोग गर्न र बिरामीहरूलाई यथोचित स्वास्थ्य उपचारको प्रबन्ध मिलाउन सरकारलाई आग्रह गरेको छ ।
