बहुदरमाई । दिनहुँ बढ्दै गइरहेको गर्मी कम नभएपछि बहुदरमाई नगरपालिकाले शिक्षण संस्थाहरु थप पाच दिनका लागि बन्द गर्ने निर्णय गरेको छ ।
यसअघि बढ्दो गर्मीका कारण बालबालिकाहरुको स्वास्थ्यमा प्रतिकूल प्रभाव परेको भन्दै बहुदरमाई नगरपालिकाको कार्यालयले जेठ २१ गतेदेखि जेठ २६ गते शुक्रबारसम्म नगरपालिकामा रहेका बालविकासदेखि कक्षा १२ सम्मको पठनपाठन हुने सबै सामुदायिक र संस्थागत विद्यालयहरु बन्द गरेको थियो ।
यद्यपि यो बिचमा गर्मी कम हुनुको सट्टा झन् बढ्दै गएपछि शुक्रबार एक सूचना जारी गरेर बहुदरमाई नगरपालिकाले नगरमा रहेका सबै विद्यालयहरु थप पाच दिनको अर्थात जेठ ३२ गतेसम्मका लागि बन्द गर्ने निर्णय गरिएको जनाएको छ ।
तापक्रम घट्नुको सट्टा झन् बद्दो अवस्थामा रहेकाले वर्षे विदामा कट्टा हुने गरि थप पाच दिनका लागी अर्थात जेठ ३२ गतेसम्मका लागि विद्यालयहरु बन्द गर्ने निर्णय गरिएको नगरपालिकाका प्रमुख प्रशासकिय अधिकृत महमद शेरे मुस्तफाले शुक्रबार जारी गरेको सूचनामा उल्लेख छ ।
पर्सा, बारा लगायत मध्यतराईका जिल्लाहरुमा पछिल्लो दुई सातायता अत्याधिक गर्मी बढिरहेको छ । यसक्षेत्रमा तापक्रम बढेर अधिकतम ४४ डिग्रि सेल्सियससम्म पुगेको छ । बिहीबार वीरगञ्ज र यसआसपासको क्षेत्रमा अधिकतम तापक्रम ४३ डिग्रि सेल्सियस मापन गरिएको थियो ।
शुक्रबार तापक्रम झन् बढेर ४४ डिग्रि सेल्सियस पुगेको छ ।
