काठमाडौं,२०मंसिरः काठमाडौंको न्यूरोडस्थित एक सुन पसलमा प्रहरीले छापा मारेर झण्डै ८ किलो सुनसहित एक व्यपारीलाई पक्राउ गरेको छ ।
उपत्यका अपराध अनुसन्धान कार्यालय बानेश्वरको टोलीले मंगलबार राति ७ किलो ८ सय ग्राम सुनसहित ‘ओमपाल गोल्ड शप’ का सञ्चालक पदमप्रसाद पाण्डेलाई पक्राउ गरेको प्रहरी वरिष्ठ उपपरीक्षक सोमेन्द्रसिंह राठौरले बताए ।
पाण्डेले तस्करीको सुन गालेर गहना बनाएर बेच्ने गरेको सूचना प्रहरीले पाएको थियो । त्यहि सूचनाको आधारमा पुगेको प्रहरीले छापा मारेर सुन बरामद गरेको हो ।पाण्डेले उक्त सुन कहाँबाट ल्याएको हो भन्ने विषयमा अनुसन्धान भइरहेको प्रहरीले जनाएको छ ।
यसअघि प्रहरीले गत साउन ३ गते त्रिभुवन अन्तर्राष्ट्रिय विमानस्थलको भन्सार जाँच पार गरेर बाहिरिएको ६० किलो सुन बरामद गरेको थियो । त्यसअघि विद्युतीय सिगरेट (भेप) मा लुकाएर समेत ९ किलो सुन तस्करी भएको थियो ।
यी तस्करी प्रकरणहरुबारे छानबिन गर्न सरकारले उच्च अदालतका पूर्वन्यायाधीश डिल्लीराज आचार्यको नेतृत्वमा उच्चस्तरीय छानबिन समिति पनि बनाएको छ । समितिले अहिले यसअघिका सुन प्रकरणमा मुछिएकाहरुलाई कारागारबाट झिकाएर बयान लिइरहेको छ ।साभारः अनलाइनखबरबाट
