वीरगंज – मधेश प्रदेशको सर्लाही जिल्लामा एकजना व्यक्तिमाथि अमानवीय घटना भएको छ । जिल्लाको पर्सा गाउँपालिका वडा नम्बर ५ बस्ने तश्लिम अन्सारीको मानवाधिकार हनन गर्दै उनीमाथि चरम अत्याचार भएको छ ।
सामान्य विवादमा उनलाई सुँगुरको खोरमा हालेर कुटपिट गरिएको घटना सार्वजनिक भएको हो । उनले आफ्ना छोरीको बिबाहका लागी गहना बनाउन स्थानीय सुनचाँदी व्यवसायी कहाँ गएका थिए । त्यही बेला उनि र सुनचाँदी व्यवसायी राजेन्द्र साहसंग विवाद भएको थियो ।
घटना शनिबार बिहान १० बजेको हो । सामान्य विवाद पछी सुनचाँदी व्यवसायी राजेन्द्र साहले केहि व्यक्तिलाई ल्याएर तश्लिमलाई लगी सुँगुरको खोरमा बन्धक बनाएका थिए ।
सुँगुरको खोरमा थुनेर राजेन्द्र साहले आफ्ना वुवालाई निर्घात कुटपिट गरेको उनका छोरा कौशर अन्सारीले बताएका छन । घटनाको बारेमा थाह भए लगतै जिल्ला प्रहरी कार्यालय सर्लाहीबाट घट्नास्थलमा पुगेको प्रहरीको टोलीले ६ जनालाई पक्राउ गरेको छ ।
सर्लाहीका प्रहरी नायव उपरीक्षक सरोज राईका अनुसार तश्लिम अन्सारी , महम्मद अन्सारी , राजेन्द्र साह सोनार , कमलेश साह सोनार , राहुल कुमार महतो र पप्पु कुमार यादवलाई पक्राउ गरी अनुसन्धान हुदै छ ।
सुँगुरको खोरमा हालेर कुटपिट गरिएको अन्सारीको भिडियो अहिले सामाजिक सञ्जालमा भाईरल हुदैछ भने हेर्नेले दोषीलाई कारवाहीको माग गर्दै छन ।
