राजधानी प्रवेशको मुख्य नाका नागढुंगामा प्रहरीले अवैध चाँदीसहित एक सहचालकलाई नियन्त्रणमा लिएको छ। पक्राउ पर्ने व्यक्ति हुन्– बारा, कलैया उपमहानगरपालिका–४ निवासी ३२ वर्षीय अनिषकुमार सिंह।
सोमबार राति वीरगञ्जबाट काठमाडौंतर्फ आउँदै गरेको बा.प्र.०१–००३ ख ३७०१ नम्बरको बस नागढुंगा चेकपोइन्टमा रोकेर प्रहरीले तलासी लिँदा, बसका सहचालक सिंहले बसभित्र लुकाएर राखेको १२ किलो १७६ ग्राम चाँदी फेला परेको हो।
जिल्ला प्रहरी परिसर काठमाडौंका प्रमुख एसपी अपिलराज बोहरा भन्छन्, “चाँदी गरगहनामा सिक्री, चन्द्रमा, पाउजुजस्ता सामग्री छन्। यसको स्रोत, गन्तव्य र प्रयोगबारे अनुसन्धान भइरहेको छ।”
हाल सिंह प्रहरी नियन्त्रणमा छन्। चाँदी तस्करीको सम्भावित सञ्जालबारे अनुसन्धान विस्तार गरिएको प्रहरीले जनाएको छ।
