भारतमा हालै सम्पन्न ‘सिन्दुर अपरेसन’ पछि नेपाल–भारत सीमा क्षेत्रमा सुरक्षा व्यवस्था कडा पारिएको छ। भारतीय सुरक्षा एजेन्सीहरूद्वारा सीमा क्षेत्रमा उच्च सतर्कता अपनाइएकाे भारतीय सञ्चार माध्यमहरूले जनाएका छन्।
भारतीय मिडियाहरूका अनुसार ३५ देखि ४० जना आतंकवादीहरू बंगलादेश र पाकिस्तानमार्फत नेपालमा प्रवेश गरेको आशंका गरिएको छ। तीमध्ये केही समूहले भारत प्रवेश गर्ने योजना बनाएको दाबी पनि गरिएको छ।
यसै सन्दर्भमा भारत–नेपाल सीमावर्ती क्षेत्रमा गस्ती, जाँच र निगरानी बढाइएको छ। विशेष गरी बिहार र उत्तर प्रदेशसँग जोडिएका सीमामा एसएसबी को उपस्थिति उल्लेखनीय रूपमा बढाइएको छ।
यद्यपि, नेपाल सरकार वा सुरक्षासम्बन्धी निकायहरूबाट यसबारे आधिकारिक पुष्टि नभएको देखिन्छ। तर, भारतको गुप्तचर स्रोतहरूबाट प्राप्त सूचनाको आधारमा सीमामा विशेष निगरानी जारी राखिएको भारतीय मिडियाको भनाइ छ।
सुरक्षा विशेषज्ञहरूले यस्तो संवेदनशील सूचना सार्वजनिक हुँदा नेपाल–भारत आपसी विश्वासमा असर पर्न सक्ने र दुई देशबीच समन्वयात्मक प्रयास आवश्यक रहेको औंल्याएका छन्।
