पाँच गुणाभन्दा बढी मूल्य राखेर पोषण पूरक औषधि (फुड सप्लिमेन्ट) बिक्री गर्ने एक जनालाई प्रहरीले वीरगञ्जबाट पक्राउ गरेको छ।
वीरगञ्ज महानगरपालिका–२६ का जितेन्द्रप्रसाद कुर्मीलाई भारतको रक्सौलबाट सस्तो मूल्यमा औषधि ल्याएर महँगोमा बेच्ने आरोपमा पक्राउ गरिएको जिल्ला प्रहरी कार्यालय पर्साले जनाएको छ।
प्रहरी प्रवक्ता डीएसपी किशोर लम्सालका अनुसार कुर्मीले २१ प्रकारका फुड सप्लिमेन्ट औषधिमा आफैँले मूल्य तोकी बिक्री गर्दै आएका थिए।
“सूचनाका आधारमा कुर्मीलाई पक्राउ गरी कालोबजारीअन्तर्गत थप अनुसन्धान गरिरहेका छौँ,” डीएसपी लम्सालले बताए।
प्रहरीका अनुसार कुर्मीको साथबाट करिब २५ लाख रुपैयाँ बराबरका औषधि बरामद गरिएको छ।
