वीरगञ्जमा ई-रिक्सा चार्ज गर्ने क्रममा करेन्ट लागेर एक युवकको मृत्यु भएको छ।
मृत्यु हुनेमा वीरगञ्ज महानगरपालिका–२४ का २६ वर्षीय जाहिर अन्सारी रहेको पर्सा प्रहरीले जनाएको छ।
प्रहरीका अनुसार अन्सारी आफ्नै घर अगाडि ई-रिक्सा चार्ज गरिरहेको बेला करेन्ट लागेर गम्भीर घाइते भएका थिए। उनलाई तत्काल उपचारका लागि वीरगञ्जस्थित तराई अस्पताल लगिएको थियो। तर, उपचारको क्रममा उनको ज्यान गएको प्रहरीले जानकारी दिएको छ।
मृतक अन्सारीको शव पोस्टमार्टमका लागि नारायणी अस्पतालमा राखिएको छ। घटनासम्बन्धी थप अनुसन्धान भइरहेको जिल्ला प्रहरी कार्यालय पर्साले जनाएको छ।
स्थानीयवासीले घरमा प्रयोग हुने विद्युतीय उपकरणको सुरक्षाप्रति थप सतर्कता अपनाउनुपर्ने सुझाव दिएका छन्।
