पर्सामा मंगलबार नारायणी अस्पतालमा उपचाररत एक कैदीको मृत्यु भएको छ। मृतक राहुल तुहाराको आफन्तहरूले प्रशासन र चिकित्सकमाथि लापरवाहीको आरोप लगाउँदै अस्पताल बाहिर प्रदर्शन गरेका छन्।
जेल प्रशासनका अनुसार तुहारा बिहान जेलमै व्यायाम गर्ने क्रममा अस्वस्थ भएपछि उनलाई नारायणी अस्पताल ल्याइएको थियो। प्रारम्भिक उपचारपछि अस्पतालले आवश्यक सुविधा नभएको भन्दै अन्यत्र लैजान सिफारिस गरे पनि जेल प्रशासनले अनुमति नदिँदा उपचारमा ढिलाइ भएको र यही कारण मृत्यु भएको आफन्तहरूको दाबी छ।
अस्पताल प्रशासनले भने सक्दो उपचार गरिएको र थप उपचारका लागि तत्काल रेफर गर्न सुझाव दिएको बताएको छ। घटनापछि अस्पताल वरपरको सुरक्षा व्यवस्था कडा पारिएको छ।
