वीरगञ्जमा हैजाबाट सङ्क्रमित हुनेको संख्या अहिलेसम्म ९३ पुगेको स्वास्थ्य कार्यालय पर्साले जनाएको छ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार, विभिन्न अस्पतालमा झाडापखाला र हैजाका १ सय ६६ जना बिरामी उपचाररत छन् भने केही बिरामी उपचारपछि घर फर्किसकेका छन्।
गत अस्ति बेलुकासम्म ७१ जनामा हैजाको सङ्क्रमण पुष्टि भएको थियो। अहिलेसम्म अस्पतालमा भर्ना भएका झाडापखाला र हैजाका बिरामीको कुल संख्या ३४४ रहेको छ। यसमध्ये २७ जना आईसीयूमा, ६ जना एचडीसीयूमा र १२२ जनाको जनरल वार्डमा उपचार भइरहेको छ।
वीरगञ्ज महानगरपालिकासहित तीनै तहका सरकारहरूले महामारी रोकथाम र नियन्त्रणका लागि सक्रिय प्रयास गरिरहेका छन्।
