पर्साको वीरगञ्ज महानगरपालिकामा हैजा सङ्क्रमितको सङ्ख्या लगातार बढ्दै गएको छ। जिल्ला स्वास्थ्य कार्यालय पर्साले आज बिहान ११ बजे सार्वजनिक गरेको विवरणअनुसार, हालसम्म १ सय १५ जनामा हैजा पुष्टि भएको छ।
हिजो बेलुका ६ बजेपछि थप १ नयाँ केस पाइएको छ। वीरगञ्जमा शुक्रबारदेखि झाडापखालाको उपचारका लागि ४ सय ९३ जना बिरामी अस्पताल भर्ना भएका थिए, जसमा १ सय १५ जनामा हैजा पुष्टि भएको हो।
सङ्क्रमितमध्ये ३९ जनालाई उपचारपछि डिस्चार्ज गरिसकिएको छ भने ७६ जना विभिन्न अस्पतालमा उपचाररत छन्। स्वास्थ्य कार्यालयका अनुसार, हैजा सङ्क्रमितसहित झाडापखालाका २ सय ६६ जना उपचाररत छन्।
जिल्ला स्वास्थ्य कार्यालयले स्थानीयवासीहरूलाई सरसफाई, पिउने पानीको शुद्धीकरण र व्यक्तिगत स्वच्छतामा विशेष ध्यान दिन आग्रह गरेको छ।
