खानेपानी मन्त्री प्रदीप यादव र वीरगन्ज महानगरपालिकाका मेयर राजेशमान सिंहलाई मोबाइलमार्फत कडा शैलीमा गुनासो राखेकी एक युवतीलाई पर्सा प्रहरीले नियन्त्रणमा लिएको छ।
वीरगन्ज महानगरपालिका–२४, रामगढ निवासी किरण साहलाई शनिबार नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) किशोर लम्सालले जानकारी दिनुभयो।
प्रहरीका अनुसार हैजाको प्रकोपका कारण युवतीका पिता सहित परिवारका अन्य सदस्य गम्भीर बिरामी भई अस्पतालको सघन कक्षामा भर्ना भएपछि उनले आफ्नो आक्रोश मन्त्री यादव र मेयर सिंहलाई फोनमार्फत व्यक्त गरेकी थिइन्। सो क्रममा उनले अत्यन्त कडा शब्द प्रयोग गर्दै स्वास्थ्य र खानेपानी व्यवस्थापनमा लापरबाही भएको आरोप लगाउँदै गुनासो गरेकी बताइएको छ।
मन्त्री यादव र मेयर सिंहले युवतीको गुनासो अभद्र शैलीमा आएको भन्दै प्रहरीमा जानकारी गराएका थिए। त्यसपछि सामान्य सोधपुछका लागि किरणलाई जिल्ला प्रहरी कार्यालयमा ल्याइएको प्रवक्ता लम्सालले बताए।
युवतीले मन्त्रीलाई फोनमार्फत गरेको भनिएको कुराकानीको अडियो क्लिप सामाजिक सञ्जालमा सार्वजनिक भएपछि शुक्रबारदेखि नै भाइरल बनेको छ।
