जनता समाजवादी पार्टी (जसपा) ले भूमि समस्या समाधान आयोगको काममा सहयोग गर्न आफ्ना जिल्ला संरचना र कार्यकर्तालाई निर्देशन दिएको छ।
जसपाको केन्द्रीय कार्यालयले सबै जिल्ला समन्वय समितिलाई पत्र पठाउँदै स्थानीय तहमा भूमिहीन दलित, भूमिहीन मुसहर, अन्य भूमिहीन र अव्यवस्थित बसोबासीले जग्गा प्राप्त गर्नका लागि आयोगले तोकेको ढाँचामा विवरण संकलन गर्न सहयोग गर्न आग्रह गरेको छ।
कार्यालय सचिव योगराज लिम्बुले हस्ताक्षर गरेको पत्रमा भनिएको छ, “स्थानीय तहबाट आयोगलाई उपलब्ध गराइने विवरण संकलनका क्रममा आफ्नो क्षेत्रमा सम्बन्धित समुदाय र व्यक्तिलाई आवश्यक जानकारी दिई सहयोग र समन्वय गरिदिनुहुन अनुरोध छ।”
भूमि समस्या समाधान आयोगले गत साउन ३० गते सार्वजनिक गरेको सूचनाअनुसार सम्बन्धित विवरण आगामी ३५ दिनभित्र संकलन गरी पठाउनुपर्ने व्यवस्था छ।
