संयुक्त अरब इमिरेट्स (यूएई) मा बढ्दो गर्मीका कारण एशिया कप क्रिकेट २०२५ का अधिकांश खेलहरूको सुरुआत समय पर सारिएको छ।
इमिरेट्स क्रिकेट बोर्ड (ईसीबी) का अनुसार १९ मध्ये १८ खेल अब निर्धारित समयभन्दा आधा घण्टा ढिलो, स्थानीय समय अनुसार बेलुकी ६:३० बजे शुरू हुनेछन्।
आगामी सेप्टेम्बर ९ देखि २८ सम्म दुबई र अबुधाबीमा आयोजना हुने यस पटकको एशिया कप टी–२० ढाँचामा हुनेछ।
तर, सेप्टेम्बर १५ मा हुने यूएई र ओमानबीचको खेल भने दिउँसो ४ बजे अबुधाबीस्थित जायद क्रिकेट रंगशालामा शुरू हुनेछ। त्यो प्रतियोगिताको एकमात्र दिउँसोको खेल हुनेछ।
यस पटकको एशिया कपमा ८ देश सहभागी छन्। समूह ‘ए’ मा भारत, पाकिस्तान, ओमान र आयोजक यूएई छन् भने समूह ‘बी’ मा अफगानिस्तान, बङ्गलादेश, हङकङ र श्रीलङ्का परेका छन्।
