मुख्यसचिव एकनारायण अर्यालले जेन–जी आन्दोलनको मागअनुसार गठन हुने नागरिक सरकारसँग काम गर्न प्रशासन तयार रहेको बताउनुभएको छ। सिंहदरबारमा क्षतिग्रस्त पूर्वाधारको निरीक्षणपछि पत्रकारसँग कुरा गर्दै उहाँले अत्यावश्यक सेवाहरू सञ्चालनमा रहेकाले सेवाप्रवाह प्रभावकारी बनाउन निर्देशन दिइएको जानकारी दिनुभयो।
अर्यालका अनुसार राहदानी र वैदेशिक रोजगारलगायतका सेवा अनलाइनमार्फत शुरु भइसकेका छन् भने खानेपानी, विद्युत् र टेलिफोनजस्ता सेवा नियमित सञ्चालनमा छन्।
सुरक्षाको जिम्मा नेपाली सेनाले सम्हालिरहेको र अवस्था सामान्यतर्फ उन्मुख रहेको उहाँले बताउनुभयो। साथै, आन्दोलनका कारण प्रशासनिक अभिलेखमा ठूलो क्षति पुगेकाले प्राविधिक मूल्याङ्कन गरिने पनि जानकारी दिनुभयो।
