बाराको जिल्ला प्रशासन कार्यालयले आइतबारदेखि सेवा सुचारु गर्ने भएको छ। प्रमुख जिल्ला अधिकारी प्रकाश पौडेलले शनिबार सूचना जारी गर्दै भदौ २३ र २४ गतेको आन्दोलनका कारण रोकिएका सेवाहरू अब पुनः सञ्चालन हुने बताएका छन्। आइतबार बिहान ६ बजेदेखि जिल्लाभर निषेधाज्ञा हटाइएको छ।
यसैबीच, जितपुरसिमरा उपमहानगरपालिकाले पनि आजदेखि सेवा पुनः सुरु गर्ने घोषणा गरेको छ।
उपमहानगरपालिकाका उपसचिव शिवजी प्रसादले जारी गरेको सूचनाअनुसार राष्ट्रिय परिचयपत्रबाहेकका सबै सेवा सञ्चालन हुनेछन्। साथै, विद्यालय तथा शैक्षिक संस्थाहरूमा पठन–पाठन पनि नियमित हुने भएको छ।
तर, आगजनीका कारण क्षतिग्रस्त वडा नं. ११ देखि १६ का कार्यालयहरूको सेवा अर्को सूचना पछि मात्र सुरु हुने जनाइएको छ।
