मधेश प्रदेशका खेलकुद तथा समाज कल्याण मन्त्री प्रमोद जैसवालले गत भदौ २३ गतेको जेन–जी प्रदर्शनका क्रममा २० जनाको मृत्यु भएपछि सामाजिक सञ्जालमार्फत राजीनामाको घोषणा गरेका थिए । तर अहिले उनले सो फेसबुक पोस्ट डिलिट गरेका छन् ।
उक्त पोस्टमार्फत उनले लेखेका थिए, “नागरिक नै नरहे मन्त्री पदमा रहनुको औचित्य छैन । म राजीनामाको घोषणा गर्दछु।”
तर अहिले पोस्ट मेटिएकोले उनले राजीनामा फिर्ता लिएको संकेत मिलेको छ ।
राजनीतिक विश्लेषकहरूका अनुसार उनले सो दिन जेन–जी को दबाब वा भावनात्मक आवेगका कारण तत्कालीन अवस्थामा राजीनामा घोषणा गरेका हुनसक्छन् । तर अहिले पोस्ट डिलिट गर्नु उनको लागि नैतिक घेराबन्दी साबित भएको छ । यसलाई “हतारको निर्णय, फुर्सदको पछुतो” भन्ने जस्तै भएको टिप्पणी गरिएको छ ।
जैसवालले २०७९ सालको प्रदेशसभा निर्वाचनमा पर्सा क्षेत्र नम्बर ३ (क) बाट स्वतन्त्र उम्मेदवारका रूपमा विजयी हासिल गरेका थिए । पछि उनले जसपा नेपाल हुँदै नेकपा एमालेमा प्रवेश गरे 
एमाले प्रवेश गरेको केही समयमै मन्त्री बनेका उनी छोटो समयमा नै मन्त्री पदमा पुगेकाले त्यतिबेला पनि धेरैलाई आश्चर्यचकित बनाएको थियो ।
